Wuběr rěčow:
Wosadny kěrchow w Chrósćicach
Kěrchow w Chrósćicach słuša wosadźe swjateju jap. Symanje a Juda Tadejej. Nimale 4000 wosadnych staraja so wo něhdźe 1000 rowčkow jich přiwuznych.
W srjedźišću steji farska cyrkej, kotruž kěrchow we wšěch stronach wobdawa. Ze štyrjoch kóncow su durje abo wrota na kěrchow, dokelž wužiwaja so nic jenož jako puć na rowčk, ale tež jako puć do cyrkwje. Wšitke wrota su přeco wotewrjene. Po kemšach je zwašnjom, zo wěriwi rowčki jich zemrětych přiwuznych wopytaja k modlitwje. Tohorunja skići so přiležnosć k bjesadźe z druhimi wěriwymi. Kěrchow je tuž nic jenož městnosć modlitwy, wopomnjenja a nadźije za zemrětych přiwuznych, ale tež městnosć zetkawanje a jedne z centralnych městnow wosadneho žiwjenja.
Kěrchow je wobdaty z krutej murju, kotraž je na južnym a zapadnym boku hač do 4 metrow wysoka. W lěće 2003 so dźěl murje sypny a dyrbješe so wobšěrnje ponowić.
Hłowne šćežki kěrchowa buchu wot 2010 do 2017 dospołnje plesterwane.
Dźensniša wulkosć kěrchowa nasta po nowotwarje farskeho kubła we 18 lětstotku. Tehdy běše farske kubło mjez dźensnišej čěłownju a kapłanstwom zaměstnjene. Tehdy wulkosć kěrchowa wjace njedosahaše a dyrbješe so powjećić. Rozsud padny na přepołoženje farskeho kubła a nic na přepołoženje kěrchowa na blak zwonka wsy.
 |
 |
 |
 |
 |
 |
 |
 |
Dnja 23.4.2023 wuda wosadne předstejićerstwo wosady swj. jap. Symana a Judy nowy kěrchowski a popłatkowy porjad za wosadny kěrchow.
Porjadk móžeće sebi pod sćěhowacym linkom woćinić: kěrchowski porjadk wosady w Chrósćicach.
Stacije křižoweho puća
Podłu kěrchowskeje murje steja 14 granitowe stołpy z pěskowcowymi reliefami stacijow křižoweho puća. Srjedu w martrownym tydźenju modla so wěriwi tu křižowy puć w procesjónach, w kotrychž ze swojeje wjeski do farskeje wjeski putnikuja. Reliefy buchu w poslednich lětach restawrowane.
Na nyšporach a swjatych dnja so Bože mšě a nyšpory zwjazaja z procejónom po kěrchowje.
Marijanska Grota
Při šćežće wot kěrchowa na farski dwór bu 1931 Lourdeska Grota natwarjena. Darił je ju wosadźe farar Jakub Šewčik, kotryž bu tež na našim kěrchowje pochowany. Grotu samu stwori Alois Hueber z Wallersteina z Bayerskeje. Postawa Maćerje Božeje je wot Matthiasa Corra, jako přebywaše w Drjezdźanach. Grota přeprosy k modlitwje, wokřewjenju abo tež cyle jednorje k přestawce. Tohorunja je woblubowany pozadk za dopomnjenske fota spožćenja sakramentow našim wosadnym.
Narowne kamjenje z 11./12. lětstotka
Jako so w lěće 2004 twarjenje bywšeje stareje šule wottorha, namakachu w fundamentach štyri kamjenje ze zornowca, na kotrychž běchu křesćanske symbole. Přitomni archeologojo spóznachu hnydom hódnotu tuteje namakanki. Z lěta 1837, jako so stara šula natwari, słužachu jako zakładne kamjenje. Kak so kamjenje do toho wužiwachu, njehodźi so hižo rjec, tež hdyž je twarjenje stareje šule blisko kěrchowa. Hnydom po wotkryću tutych kamjenjow dowjezechu je do archeologiskeho zarjada do Drježdźan k dokładnišemu přepytowanju. Dokelž słušeja tajke wuznamne namakanki zjawnosći a nic wobsedźerjej ležownosće, na kotrejž běchu je namakali, běše wěste, zo so tute narowne kamjenje hižo do Chrósćic njewróća. W Drježdźanach so wone přeslědźa a muzejam za wustajeńcy přewostajeja.
Někotre wuslědki wšak je přepytowanje hižo přinjesło: Na zakładźe přirunanjow wuchadźeja archeologojo z toho, zo su kamjenje z 11. abo 12. lětstotka. Křesćanske symbole na nich pokazuja na wužiwanje jako narowne kamjenje. Z tym su najstarši dopokaz křesćanstwa we Łužicy, samo starše hač wšitke dotal namakane spisy. Najstarše spisy su z lěta 1225, hdźež so Chrósćicy naspomnja. Kamjenje pak su 100 abo 200 lět starše.
Dokelž pak so kamjenje w Chrósćicach samych wustajeć njemóžachu, zasadźi so wosadny farar Clemens Hrjehor za to, zo dóstanje wosada znajmjeńša kopije tutych do Chrósćic. Při nowoplanowanju areala stareje šule so hnydom městno za to připrawi. Dnja 29. oktobra 2007 bu wopomnišćo na nyšporje poswjećene. Hačkuli su tam dźensa jenož kopjie, kotrež su po hódnoće a waze wo wjele niše hač originalne namakane kamjenje, swědča wone wo zažnych křesćanach w Chrósćicach. Syła wosadnych bě na nyšpor přichwatała a zwurazni z tym swoju zwjazanosć ze zašłosću.