Wuběr rěčow:

Wozjewjenja za farsku wikariju w Pančicach-Kukowje

Biskopstwo Drježdźany-Mišnjo. Wšitke Bože słužby su hač na dalše wotprajene.

Duchownje zwjazani so modlić:

Namjet je, zo so w zwučenych časach na njezwučenych městnach zetkawamy a k modlitwje zhromadźimy. Kóždy sam abo w swójbje zhromadnje, kaž je to móžne a spomóžne.

njedźelu 9.00 hodź.: kemše přez internet (link na hłownej stronje)

njedźelu 14.30 hodź.: póstna pobožnosć (wos. čo. 43)

wutoru w 15.30 hodź.: křižowy puć z dźěćimi (wos. čo. 49 - namjetuju stacije dźělić, dokelž je jara dołhi; n. př. 1-7 staciju a tydźeń pozdźišo 8-14)

srjedu we 8.00 hodź.: litaniju k swj. Bosćanej (wos. čo. 26/23)

srjedu w 18.30 hodź.: Bolosćiwy róžowc (wos. čo 25/3)

pjatk w 19.30 hodź.: křižowy puć (wos. wot čo 44) - namjetuju pjatk započeć z prěnim

sobotu w 20.00 hodź.: vesper młodźiny (wos. čo. 19) abo přez instagram Chróšćan młodźiny

na 5. póstnej njedźeli, dnja 29.03.2020

1. Wotpowědujo přikazej knjeza biskopa so tuchwilneje krizy dla na njewěsty čas žanežkuli zjawne Bože słužby njeswjeća, zhromadźizny abo skupinske zetkanja so njewotměwaja a nabožina so njepodawa.

2. Skazane intencije za Bože mšě so wšědnje do njezjawnych kemši zapřijeja. Dokelž njemóžeće kemši hić a tež nic k swjatemu woprawjenju přistupić, modlće so doma z wotrězkow "Hdyž Kemši hić njemóžeš" (Wosadnik str. 135) a "Duchowne swjate woprawjenje" (Wosadnik str. 136).

3. Cyrkej je wšědnje wodnjo za wosobinsku modlitwu wotewrjena.

4. Farski zarjad docpějeće w přichodnym času jenož přez mejlku, list abo telefon. Móžeće pak tež jednorje cedlku do listoweho kašćika na farje ćisnyć z Wašej powěsću, Wašim naprašowanjom, Wašej próstwu abo Wašim pokiwom (njezabudźće podać mjeno a adresu a/abo tefonowe čisło).

5. Je-li štó w smjertnej nuzy smě duchowny k Wam do domu přińć. Prošu zawołajće za to pod čisłom 035796/804016. Normalne domawobstaranja tuchwilu njejsu móžne.

6. Tradiciju křižerjow je krajnoradny zarjad za lětsa zakazał.

7. Vatikan je 25.03. přez kardinala Roberta Sarah wšitkim biskopam a měšnikam tuchwilneje pandemija dla zakazał, martrowne a jutrowne liturgije zjawnje swjećić. W samsnym wukazu so wšitke ludowe pobožnosće a procesijóny martrownych a jutrownych dnjow zakazaja (pola nas poćahuje so to na zhromadne křižowe puće, modlitwy při křižach a na křižerjow).

8. W běhu zašłeho tydźenja je radostna powěsć do farskeho běrowa dóšła: Krajnoradny hamt w Kamjencu je přilubjene LEADER spěchowanje we wysokosći 148.000 € za našu farsku třěchu tež cyłkownje přizwolił. To wobradźa wulke wjeselo a mytuje wšu prócu, kotruž smy loni nałožowali. W přichodnych dnjach přihotujemy wotličenje za biskopstwo.

9. Njedźelniše kemše 29.3. wusyłaja so z Ralbic.
(Link: https://www.youtube.com/watch?v=yE640CsMqHE&feature=youtu.be)

10. Firmowanje w našej wosadźe, planowane za 26.4., njebudźe. Pruwujemy móžnosć přepołoženja. Dokładne informacije so hišće wozjewja.

11. Jutrowne swěčki móža so we wěži sobuwzać, prosymy za to wo mały dar.

12. Bratstwo swjateho Bosćana poskići w tutych dnjach konkretnu pomoc samostejacym abo staršim ludźom (např.: nakupować abo podobne). Prošu nawjazajće k tomu kontakt: Hojer, Bósko z Jaseńcy 0176 57677413, Wałda, Bjarnat z Prawoćic 0157 87600744 abo Špitank, Jurij ze Zejic 0172 7973829.

13. Zemrěłoj stej z wosady:
Dnja 18.03. Jan Jakubaš ze Zejic w starobje 81 lět. Jeho chowanje běše 21.03. Wón bě sobustaw Bratrstwa swjateho Bosćana. Modlitwa za njeho je 29.03. na kemšach.
Dnja 26.03. Jan Pjech z Noweje Wjeski w starobje 80 lět . Paćer pusteho wječora za njeho je sobotu a njedźelu wot 16:00 do 18:00 hodź. w cyrkwi. Chowanje je póndźelu 16:00 hodź. - RIP -

 

Impressum und Datenschutz / Impresum a škit datow