Dźiwadłowa hra "Via Regia woła"

kowar Lukaš a starosta Wincar ze sydlišća
scena z konjacym zapřahom wikowarja sydlišća

[awgust 2010] Z wulkim zapalom a dźěłom njesměrnje wjele ludźi předstaji so w awgusće 2010 dźiwadłowa hra "Via Regia woła" na Chróšćan farskej łuce pod hołym njebjom.

Běše to k wopominanju 1000. narodnin swjateho Bena, biskopa Mišnjanskeho biskopstwa, kotryž narodźi so w lěće 1010. Wón njebě prěni, kotryž je w našej kónčinje wěru rozšěrjał, ale najwuspěšnišo a najbóle přeswědčiwje. 

Hra předstaji stawizniski wurězk wjesneho žiwjenja na kóncu 11. lětstotka, jako so podłu Via Regije křesćanska wěra do wuchoda rozpřestrěwaše. Wjesnjenjo buchu z nowej wučbu konfrontowani a w běhu jednanja přiwzaja poněčim křesćansku wěru. Dale předstaja někotre sceny dźěło biskopa Bena w Mišnje a jeho wopyt w sydlišću při Satkuli, jako połoži so zakładny kamjeń za cyrkej swj. Symanej a Judźe Tadejej. 

Mnohe masowe sceny, kaž tež sceny z konjemi a zapřahami, zajachu přihladowarjow. Tuž njebě dźiwa, zo zaspěwa publikum po prapremjerje awtoromaj Jurjej Špitankej a Pětrej Zahrodnikej, hrajerjam a wšitkim angažowanym za jewišćom trójnu "Sławu" za jich wulkotny wukon.

Tu widźiće někotre impresije. We wudatej knize wo dźiwadłowej hrě móžeće wjace wo nastaću a wobsahu hry čitać a sej wobrazy wobhladać. Kniha je w farskim běrowje w Chrósćicach za 15,- € na předań.

masowa scena sydlišća
trójna "Sława" wšitkim wobdźělnikam
kniha: Via Regia woła

To top

wróćo | k započatkej
Impressum und Datenschutz | Impresum a škit datow